No need to zoom in ur lences just click on the image below trust me its readable ;)

Roshani

Daaman naa chodenge doobate suraj ka
Apane kandhe par khe layenge usaki sawari
Par roshani ko doobane naa denge

Andhiyara chahe niglane ko ho chand
Hatho me tare liye rakhenge puri taiyari
Par roshani ko doobane naa denge

Kitani bhi katil ho chale hanwaye
Seena tane karenge lou ki paharedari
Par roshani ko doobane naa denge

Nilane lage kaalima ujaas jab antar ka
Himmat ke dam par phir jagayenge ujiyari
Par roshani ko doobane naa denge
HAM roshani ko doobane naa denge

Meri Nishaniya..

Karodo ki bhid me khojati hoo khudako

To kuch nishaniya sujha deti hoon

Tez hawao ka rukh modana lagta hai jab mushkil

Panchi ko dekh sanhas jaga leti hoon

Darti hai jab bhi aankhe band hone se

Chupake se ek naya sapana saza leti hoon

Ufanati hai nadi jab aankho se bahane ko

Ek bar phir halke se muskara leti hoon

Har ke war se hathash ho jati ho jab bhi

Nayi Koshish ka ek deep jala leti hoon

Karodo ki bhid me khudko khojati hoon jab

To kuch nishaniya sujha deti hoon

Jab Ham ..

Bejaan diwaroo se batiyate hai

Aur Taswiro ko hakikat banate hai

Jab ham apane ko akela pate hai

Badalo me nakshe banate hai

Aur patthro ko kahani sunate hai

Jab ham apane ko akela pate hai

Thahare pani me chap chap bajate hai

Aur bin bat yu hi gungunate hai

Jab ham apane ko akela pate hai

Chand ke piche piche jate hai

Aur tare gin gin kar bhool jate hai

Jab ham apane ko akela pate hai

Koshish karte hai chup rahane ki

Aur chuppi se ghabrate hai

Jab ham apane ko akela pate hai

Rahathe hai isi duniya me

Aur khudko dusare jaha me paate hai

Jab ham apne ko akela pate hai

Shayad ?

Dhue me lakadi fukate hue nani aanchal bhiga rahi hai

Mitti ke chulahe me sik rahi makki ki rotiya bula rahi hai

Maa ke chehare par gahari padati parchai bata rahi hai

Wo bhi lambe arase se raaho me palanke bicha rahi hai

Sawan ki lagi jhadi bhi pani me chap-chap baja rahi hai

Mitti ki soundhi khushboo mera aangan mahaka rahi hai

Kano ko chu-kar nikalati ye hawa bhi suna rahi hai

Sune pade baagiche ke pedo ko meri yaad sata rahi hai

Baanto baanto me ruaasi hoti aawaz jata rahi hai

Meri bahana bhi kisso aur shikavo ki potali bana rahi hai

Ladkhadane lagi paa ki boli kano me gunje ja rahi hai

Shayad unako bhi apane raja beta ki kami sata rahi hai

Meri khule aankhe bhi ye kaise manzar dikha rahi hai

Sach hai shayad ki mujhe hi ghar ki badi yaad aa rahi hai

Be-raham Lahar ~ ~

Duboyi hai kitni bar yadoo ki potali is sagar ki goud me
Har lahar phir kyo, un yadoo ke nishaan louta lati hai


Mitane ki koshish me hai jin panno ko zindagi ki kitab se
Sahil par bikhari mitti, phir kyo un lamho ko uker deti hai


Sametate hai mushkilo se apane yaha waha tute pade hisso ko
Kaise ye bas apne choone bhar se hi phir unhe bikher deti hai


Kinaaro sa sunaa mann badi mushkilo se sadhata hai chuppi
Badati hai is tarah ki sune pade taroo me sangit ched deti hai


koshisho se jami hai kabar me dabi khawaisho par waqt ki mitti
Be-raham..ye beraham lahar sari koshisho par pani pher deti hai

khamosh patthar ...

Shor machati laharo ke beech khamosh betha patthar
Jo laharo ka war chup-chap sahata aaya tha ab tak
Mujhse kuch kahani kahata hai

Aati jati lahare machati hai aatank kitna...
Uthati hai hazaroo tufaan uske bhi mann me
Ye baat jubaani kahata hai

Jab bhi duboota hai khud ko aansuo ke khare paani se
Zamana samjahta hai ki jwaar bhata hota hai

Usake patthar dil hone ki charcha karta hai chappa chappa
Par dard usake bhitar bhi sisak sisak kar rota

Wo khamosh patthar mujhse ye kahani kahata hai

Musibato ko gale lagakar jina mushkil to hota hai
Par ab in musibatoo ke bina use khali khali sa mahsoos hota hai

Gamo ki barish se sarobar hai wo is kadar
Ki ab khushi ke mouke par bhi wo ji bhar ke rota hai

Wo khamosh patthar mujhse apni kahani kahata hai
Beeti us par jo ab tak wo baat jubani kahata hai

Tees...

Sadko par nange badan bilakati hai zindagi
Aur aag ugalati dopahari me peir jhulsati hai zindagi
Antoo ko chamadi se chipakaye soti hai zindagi
Aur kankad ki dheri me anaj ki aas khojati hai zindagi

Ek roti paane ko hazaro bar siskati hai zindagi
Aur rukhe tukade ko pani se bhigokar nigalati hai zindagi

Sade gale kachare ki goud me janamati hai zindagi
Aur zaharile dhue me saans lakar panapati hai zindagi

Roz mar mar kar seene me tees uthati hai zindagi
Har lamha markar bhi aur jine ki chahat jagati hai zindagi

Wo Lamha..

Sahamaa huaa saa lamhaa phir vakt ki aagosh me kho gayaa
Sine me dabaa darad vakt ki lorii sunakar so gayaa
Kuchh yek boond aasuo me ghul gaye gile shikave
Aankho se nikalaa paanii bhii namakiin ho gayaa

Jaane kis ghadee me koee khataa kar baitheKi kuchh naa kah paanaa bhii kusoor ho gayaa

Bahut ki koshishe ki chhupaa jaaye jakhm
Par ghaav dab gayaa itanaa gaharaa ki sangiin ho gayaa

Sirahaane hii baithaa rahaa gamo kaa pulandaa raat bhar
Hhour hote hii vo bhii khvaabo saa kaaphoor ho gayaa

kuch aur

Kuch mil aur manzil ki aur chalne ko
Kuch patthar aur rukawate banane ko
Kuch ajoobe aur khoj kar lane ko
Kuch pal aur shrarate kar pane ko

Kuch deeware aur fand kar jane ko
Kuch jhapkiya aur class me le pane ko
Kuch homework aur na karke jaane ko
Kuch cartoon aur teachers ke banane ko

Kuch DATELINE aur chapane jane ko
Kuch jagti rate aur lab me bitane ko
Kuch masle aur jhagdane, suljhane ko
Kuch Parle G aur chai sang khane ko

Kuch melange aur jeet kar aane ko
Kuch page 3 aur kabhi na jane ko
Kuch gane aur thatha sang gane ko
Kuch foolball aur kick kar pane ko

Kuch zindagi aur azad ji pane ko
Kuch sanse aur yaha le pane ko
Kuch nazare aur aankho me chupane ko
Kuch aasma aur ye yaade samet le jane ko

wo chand !!

Kal rat chand khidki se batiya raha tha
Lakho taro ke bich tanha nazar aa raha tha

Mujhe apne sang duniya ghuma raha tha
Meri sunkar kuch apni suna raha tha

Chandani bhini bhini si barasa raha tha
Kisse kahaniya gadhe ja raha tha

Ankhon me sapne bhare ja raha tha
Lori sunakar thapakiya diye ja raha tha

Batoon batoon me fasla ghata ja raha tha
Milo door ka aasma karib aa raha tha

Achanak wo roshni mattham kiye ja raha tha
Ek nayi subah ko jindagi diye ja raha tha

Ek pal tanhai me ...

Barso chalte rah hai taptapati dhoop me,

Apana ask dekha nahi kabhi parchai me

Bulandio ko choone ka nasha tha is kadar,

Socha nahi kuch daba hai gaharai me

Patthar dil ban gaye the jamane ko dekhkar,

Ek aansoo bhi na bahaya ruswai me

Manzil ko badte kadam thame nahi kabhi,
kabhi thahare nahi ped ki tarai me

Jaldi me the ham ya waqt thahara nahi,

Bitaya nahi kabhi ek pal tanhai me

He sath khuda

Tanhaiyo ki bate karate rahe sabhi

Pahali bar ham gufatgu me shamil na the

Soch rahe the kaha chupa betha tha khuda

Ya ham hi use mahasos karne ke kabil na the

Wo to har kadam mere sath chal raha tha

Manzil thodi dor thi par raste mushkil na the

Uske bharose chal pade the anjan raho par

Kashti mudi nahi un laharo par jinke sahil na the

Andhero ko apna mukkadar samjhane lage jab

Roshani ne muskurakar kaha ham usake katil na the

He sath khuda to har jang fatah honi hai

Pa jayenge wo muka bhi, jo ab tak hasil na the

Hame darna tha .........

Safed kapado me lipti wo suli par latak rahi thi

jisase hame darna tha

Cham cham payal hamare pero par wo baja rahi thi

jisase hame darna tha

Mera hath thame mout ke kue me wo le ja raha tha

jisase hame darna tha

Kale pardo ke piche chupe the wo daravne chehare

jisase hame darna tha

Kali kabar ke kisi kone me soyi thi wo zinda lash

jisase hame darna tha

Andheri gufa ki uchayi par lataka tha wo khokhla sharir

jisase hame darna tha

Kono ke parado me cheekh rahi thi wo anjan awaze

jisase hame darna tha

Dararo aur surakho se jhoor rahi thi wo chamkati aankhe

jisase hame darna tha

Badi bhayawah lagani thi wo andheri gufa ki deeware

jisase hame darna tha

Khilkhila rahe the apne ander kahi chupe us dar par

jisase hame darna tha

Gam muskarata hai!

Kuch nahi jo daba hai antar man me

na kuch jo chupa neele gagan me

Bahata pani nahi gata meetha geet

Panchi bhi nahi sunate koi sangeet

Bas ek hi dhun mann gungunata hai

Bulbulo si ud jati hai khushi zindagi me

Gam hi hai jo lamba thhahar jata hai

Ek ye hi saccha dost hai banaya hai

Jab me rou rota hai gao to gata hai

Nukkad ki Bhel aur pani-puri khata hai

New style jeans dekh, man lalachata hai

Khidaki ke sahare chadata hai chat par

Upar pahuchkar khari khoti sunata hai

Chehra mera Murjhaya dekhkar kilkhilata hai

Aur halki si hansi mere hoto par le aata hai

Na jane kyon duniya roti hai gam aane par

Wo to har pal mere sath muskarata hai

Der se..

Kahi chat thi, Deewaroo dar the kahi, mila mujhe ghar ka pata der se

Diya to bhut Zindagi ne mujhe, par jo bhi diya wo diya der se

Hua na koi kam mamul se, Gujare shabo-roj kuch is tarah

Kabhi chand nikal galat wakt par kabhi ghar me suraj uga der se

Kahi ruk gaye rah me be-sabab, kahi wakt se pahale ghir aayi shab

Hue band darwaje khul khul ke sab, jaha bhi gaya me gaya der se

Yah sab ittifakat ka khel hai, yahi hai judai yahi mail hai

Hum mud mud ke dekha kiya door tak , bani wo khamoshi sada der se

Saja din bhi, roshan hui rat bhi, bhare jam lahrai barsat bhi

Rahe sath kuch aise halat bhi, jo hona tha jaldi hua der se

Bhatakati rahi yu hi har bandagi mili nahi mujhe koi roshni

Chupa tha kahi bhid me aadmi, hua mujhme roshan khuda der se

(courtesy Nida Fazli)

in{irfan}form

To,
My Inspiration (IRFAN)
Happy New Year! I know it’s too late but my new year has started by today [11 Jan]. Last year taught me a lot but i missed my soal that is you. On jan 1 i tried to tell this to you but "Kalam Ne Chalne Se Inkar kar diya!". My pen starts blacking the white papers of my diary by yesterday only when i was looking in your eyes before going to bed. I was missing one thing terribly after coming to B'lore talking to you on papers .You must felt like i talked to you when only I need you. If you are still thinking that I am selfish than I cant do much only want to tell you something which I couldn't told you on new year.
1.Feb to April, April to June and August to this Jan it’s a different journey all together. Wherever I have been you were with me all the way. I never show like i need you but whenever I came to you with my problems Khali hath nahi lotna pada.
2. What compel me to write still I don’t know but I believe you didn’t mind when I shared my cheers and tears with you.
3.The journey from Ad-world to Forth estate was not that easy but because I had you I travelled it without fear i know if you said there is no harm to go in media thr can't be any.
4.You struggle a lot in last few months and I was pretty busy in some crap. Orkuting, G-mailing and some stupid stuff which was not at all go towards my GOAL but i was doing that all. Wasn’t talking to you. My Apology!
5.I was told to chop so many things I didn't chop any but I cut some corners of my heart and edit your part almost totally Although you never left me when I came back to you on birth day u was as it is and I recognized who-ever can change in the world. I can be natural with one!
6.Have you observed the change in environment Indoor [Indore] to outdoor [B'lore] I dragged you with me here also and always blame you that things are not going right and you never complained. I know you tried ur best to make me fit here and I always told u that in my case IT TAKES TIME!!
7.31st Dec. everybody was talking about New Year resolution but I was thinking about what I have done in the year 06. For me it was not 06 I felt like I turned into 60 in 06 . it was like I am living in my old sixties.
8.While learning camera operation when I zoomed-in in some lives the sharp focus has given me only one sharp image Fake Lifestyle! I thought you are also the animal of the same world fake-world and you were not feeted in my Irfan frame so stop talking to you. I cant live without ur that image which I framed for you and I couldn’t let you feet in any other window.
9.Media is a turmoil I started doubting everybody. How and when you entered in the list "Pata hi nahi chala”. Everyone was around but I was desperately want to tell you many things. I made many attempts but the result was only blank pages of diary.
10.Finaly I decide to write you. Why I stopped and why I again start is a question contains the entire question elements Five W’s and one H but one thing I have noticed that is you were right!

I realised that “If you are in Rome Do What Romans Do!”

One full year has gone how fast and how happily (well not really). Many times I make You in problems but thanks for be my first experience of professional life. I entered in the "Kajal Kothari" by carried your sunshine with me. I will always remember the lines which we made together
Don’t think you can
Believe you can
Then you can!
Hope we will never have a hard time as we had. I assure you that 07 will not be like Seventies for us ;)
Let’s back to pavilion! We will share some important work half-half
You break the stump and I will break the news.

Yours Troublemaker

Thokar!

Lagi pahli thokar, bikhar gaye tukdo me

Ab apna hissa khud se hi chuna nahi jata

Haste the auro par sunke unke kisse

Biti jo khud par to saya pahchana nahi jata

Apne aap ko anokha samajh bethe the hum nada

Chuta hamse wo, jo kabhi choda nahi jata

Khade rahe barso barish ke intzar me

Bhul gaye registan me badal barsa nahi karta

Ab Bhi...

Barso bad jab doopahari dekhi apane aangana

Laga ab bhi aag ka gola sulagta hai

Choti-choti batooon par khil-khilati hai zindagi

Ab bhi haandi me chaval ublata hai

Chaate hai ghanghor badal dukh ke aksar

Par pyaar ka sawan ab bhi barsata hai

Gahari padi hai maa ki jhuriyaa kuch

Par chehara ab bhi chamkata hai

Salvate padti hai mathe par dooriyon se

Aansuon ka sagar ab bhi chalakta hai

Barso ho gaye hai ghar ko chode maano

Par wo ab bhi mere sath hasta hai rota hai