Baadlo main jane kaise chup gayi thi chandani

Tare the jo raat bhar ye aasma damka rahe

Har lahar ke sang maano dubati ho roshani

Thik usi pal ek aur katra bulbule le aa rahe

Thodi jo gharayi raat ye bhi natkhat ho chala

Goud main soyi roshani se atkheli karta phire

Har machalati dhaar ko chooti hai kuch yu pawan

Thande pade saagar main ek chingaari sulgaati chale

Koi batalaye to zara poochkar isase mujhe

Kis nashe main raat bhar ye be-khouf lahlahati rahe

Shabnamo ki barisho se bhigta rahe daaman yunhi

Har lahar ki raagini bas kano main gungunati rahe

Atak jaye kahin palanko ke beach main hi ye samaa

Aankh khule jab bhi, in palon ki yaad mahakati rahe

Nishaan

Kaha Chod aanyi chanchanati payal wo..

Ab Dabe paanv Chalati hai zindagi

Dishaao se puchaa karti thi pata

Binaa sahil ke nishaan badati hai zindagi

Churati thi rang nazaron se sitaron se

Kiranoo ke kisi jhurmuth main gum hone lagi hai zindagi

Duboyi thi ungliyaan jis Chahat ki rangat main

Us khushaboo ki mahak khone lagi hai zindagi

Pichali barish main janha giri thi kuch bunde

Usi sukhe kue main jivan ki aas talashati hai zindagi..

Zindagi.... Ek Saans

Zindagi....ek saans ek aas


Dhundhale ho rahe hai jo is nisha raston ke manzilon ke
Thamkar Palbhar ek nazar ji bhar dekh lene do...


Soone sa damka rahi hai jo is kore paani ko
Ek ghunt us roshani ka pi lene do...


Machalati hai jo halchal karti in leharon main
Bas ek lamha us aawaraa masti main ji lene do...



Khamosh patthar baatain karate hai jis tarah ek duje se
Unhi bolati khamoshiyon main guftugu karane do...



Hatho main bharkar dhoop liye ja rahi jo saanjh
Ek mutthi un kataron se roshan janha kar lene do...



Kya jaane kab ruk jaaye in saanson ka karawaa
Thamkar hath is pal ka ek saans main zindagi ji lene do ...

Is ek saans main puri rukakar zindagi ji lene do

Aawargi

Aawargi ke nashe main chur chale hai rahoo par

Suni galiyon ko roshan kiye ja rahe hai

Jo khali khali kona daba hai seene main

Usake band darwajoo pe dastak diye ja rahe hai

Khawaishe Dafnaye rakhi thi jo barason se

Un par padi padi mitti ko halke kiye ja rahe hai

Aane ko hai wo mousam baharon ka najaroon ka

Esi chahat main ujaad din khul ke jiye ja rahe hai

Samjhe nahi tohafe main gam mila ya khushi

Bas har lamhe ko daman main liye ja rahe hai

Aawargi ke nashe main chur chale hai rahoo par

Suni galiyon ko roshan kiye ja rahe hai

Ulajhan..

Ulajhi Padi hai jo gutthiya zindagi ki

Mann Karta hai uski har ek gaanth khol doon,

Palkon kee aut se jhankataa hai roshni ka tukada, Jo koi

Band aankho ke darawaze unke liye khol doon,

Begaani si dhun jo khanakati hai hardam kanoo main

Sajaakar suroon se use, bana koi geet anamol doon,

Bujhi bujhi gumsum si hai jo saanjh ki dehri

Natkhat chandani usaki paidhi par dhol doon,

Bhataki hai jo khushi talash main rastoon ki manziloon ki

Hath tham kar usko raahon par moud doon,

Ulajhi Padi hai jo gutthiya zindagi ki

Mann Karta hai uski har ek gaanth khol doon,

Wahi safar wahi kanrawa, bilkul wahi hai ranhe bhi

Phir kyo manzil kanhi gumshuda ho gayi hai

Wahi chand wahi chandani, taaron ne bikhari hai wahi roshani

Phir ye rat kyo khamosh chupchap so gayi hai

Wahi nazaare wahi diwarain, mahakti hai wahi khushboo ab bhi

Phir kyo fiza se sadagi khafa ho gayi hai

Wahi dhoop wahi roshani, pairon tale ki zamin hai wahi

Phir kyo apani parchayi ajanabi ho gayi hai

Wahi jism wahi jaan , wahi rooh hai ham ab bhi

Phir kyo jane ye zindagi juda ho gayi hai

Wahi mukaan hai ye wo shayad jo khawaboo me tha

Phir kyo ise pane ki khushi dhundali ho gayi hai

Wahi thama hai kal wahi hai hamara aaj bhi

Shayad ham hi hai jo waqt se aage bad gaye hai

No need to zoom in ur lences just click on the image below trust me its readable ;)

Roshani

Daaman naa chodenge doobate suraj ka
Apane kandhe par khe layenge usaki sawari
Par roshani ko doobane naa denge

Andhiyara chahe niglane ko ho chand
Hatho me tare liye rakhenge puri taiyari
Par roshani ko doobane naa denge

Kitani bhi katil ho chale hanwaye
Seena tane karenge lou ki paharedari
Par roshani ko doobane naa denge

Nilane lage kaalima ujaas jab antar ka
Himmat ke dam par phir jagayenge ujiyari
Par roshani ko doobane naa denge
HAM roshani ko doobane naa denge

Meri Nishaniya..

Karodo ki bhid me khojati hoo khudako

To kuch nishaniya sujha deti hoon

Tez hawao ka rukh modana lagta hai jab mushkil

Panchi ko dekh sanhas jaga leti hoon

Darti hai jab bhi aankhe band hone se

Chupake se ek naya sapana saza leti hoon

Ufanati hai nadi jab aankho se bahane ko

Ek bar phir halke se muskara leti hoon

Har ke war se hathash ho jati ho jab bhi

Nayi Koshish ka ek deep jala leti hoon

Karodo ki bhid me khudko khojati hoon jab

To kuch nishaniya sujha deti hoon

Jab Ham ..

Bejaan diwaroo se batiyate hai

Aur Taswiro ko hakikat banate hai

Jab ham apane ko akela pate hai

Badalo me nakshe banate hai

Aur patthro ko kahani sunate hai

Jab ham apane ko akela pate hai

Thahare pani me chap chap bajate hai

Aur bin bat yu hi gungunate hai

Jab ham apane ko akela pate hai

Chand ke piche piche jate hai

Aur tare gin gin kar bhool jate hai

Jab ham apane ko akela pate hai

Koshish karte hai chup rahane ki

Aur chuppi se ghabrate hai

Jab ham apane ko akela pate hai

Rahathe hai isi duniya me

Aur khudko dusare jaha me paate hai

Jab ham apne ko akela pate hai

Shayad ?

Dhue me lakadi fukate hue nani aanchal bhiga rahi hai

Mitti ke chulahe me sik rahi makki ki rotiya bula rahi hai

Maa ke chehare par gahari padati parchai bata rahi hai

Wo bhi lambe arase se raaho me palanke bicha rahi hai

Sawan ki lagi jhadi bhi pani me chap-chap baja rahi hai

Mitti ki soundhi khushboo mera aangan mahaka rahi hai

Kano ko chu-kar nikalati ye hawa bhi suna rahi hai

Sune pade baagiche ke pedo ko meri yaad sata rahi hai

Baanto baanto me ruaasi hoti aawaz jata rahi hai

Meri bahana bhi kisso aur shikavo ki potali bana rahi hai

Ladkhadane lagi paa ki boli kano me gunje ja rahi hai

Shayad unako bhi apane raja beta ki kami sata rahi hai

Meri khule aankhe bhi ye kaise manzar dikha rahi hai

Sach hai shayad ki mujhe hi ghar ki badi yaad aa rahi hai

Be-raham Lahar ~ ~

Duboyi hai kitni bar yadoo ki potali is sagar ki goud me
Har lahar phir kyo, un yadoo ke nishaan louta lati hai


Mitane ki koshish me hai jin panno ko zindagi ki kitab se
Sahil par bikhari mitti, phir kyo un lamho ko uker deti hai


Sametate hai mushkilo se apane yaha waha tute pade hisso ko
Kaise ye bas apne choone bhar se hi phir unhe bikher deti hai


Kinaaro sa sunaa mann badi mushkilo se sadhata hai chuppi
Badati hai is tarah ki sune pade taroo me sangit ched deti hai


koshisho se jami hai kabar me dabi khawaisho par waqt ki mitti
Be-raham..ye beraham lahar sari koshisho par pani pher deti hai

khamosh patthar ...

Shor machati laharo ke beech khamosh betha patthar
Jo laharo ka war chup-chap sahata aaya tha ab tak
Mujhse kuch kahani kahata hai

Aati jati lahare machati hai aatank kitna...
Uthati hai hazaroo tufaan uske bhi mann me
Ye baat jubaani kahata hai

Jab bhi duboota hai khud ko aansuo ke khare paani se
Zamana samjahta hai ki jwaar bhata hota hai

Usake patthar dil hone ki charcha karta hai chappa chappa
Par dard usake bhitar bhi sisak sisak kar rota

Wo khamosh patthar mujhse ye kahani kahata hai

Musibato ko gale lagakar jina mushkil to hota hai
Par ab in musibatoo ke bina use khali khali sa mahsoos hota hai

Gamo ki barish se sarobar hai wo is kadar
Ki ab khushi ke mouke par bhi wo ji bhar ke rota hai

Wo khamosh patthar mujhse apni kahani kahata hai
Beeti us par jo ab tak wo baat jubani kahata hai

Tees...

Sadko par nange badan bilakati hai zindagi
Aur aag ugalati dopahari me peir jhulsati hai zindagi
Antoo ko chamadi se chipakaye soti hai zindagi
Aur kankad ki dheri me anaj ki aas khojati hai zindagi

Ek roti paane ko hazaro bar siskati hai zindagi
Aur rukhe tukade ko pani se bhigokar nigalati hai zindagi

Sade gale kachare ki goud me janamati hai zindagi
Aur zaharile dhue me saans lakar panapati hai zindagi

Roz mar mar kar seene me tees uthati hai zindagi
Har lamha markar bhi aur jine ki chahat jagati hai zindagi

Wo Lamha..

Sahamaa huaa saa lamhaa phir vakt ki aagosh me kho gayaa
Sine me dabaa darad vakt ki lorii sunakar so gayaa
Kuchh yek boond aasuo me ghul gaye gile shikave
Aankho se nikalaa paanii bhii namakiin ho gayaa

Jaane kis ghadee me koee khataa kar baitheKi kuchh naa kah paanaa bhii kusoor ho gayaa

Bahut ki koshishe ki chhupaa jaaye jakhm
Par ghaav dab gayaa itanaa gaharaa ki sangiin ho gayaa

Sirahaane hii baithaa rahaa gamo kaa pulandaa raat bhar
Hhour hote hii vo bhii khvaabo saa kaaphoor ho gayaa

kuch aur

Kuch mil aur manzil ki aur chalne ko
Kuch patthar aur rukawate banane ko
Kuch ajoobe aur khoj kar lane ko
Kuch pal aur shrarate kar pane ko

Kuch deeware aur fand kar jane ko
Kuch jhapkiya aur class me le pane ko
Kuch homework aur na karke jaane ko
Kuch cartoon aur teachers ke banane ko

Kuch DATELINE aur chapane jane ko
Kuch jagti rate aur lab me bitane ko
Kuch masle aur jhagdane, suljhane ko
Kuch Parle G aur chai sang khane ko

Kuch melange aur jeet kar aane ko
Kuch page 3 aur kabhi na jane ko
Kuch gane aur thatha sang gane ko
Kuch foolball aur kick kar pane ko

Kuch zindagi aur azad ji pane ko
Kuch sanse aur yaha le pane ko
Kuch nazare aur aankho me chupane ko
Kuch aasma aur ye yaade samet le jane ko

wo chand !!

Kal rat chand khidki se batiya raha tha
Lakho taro ke bich tanha nazar aa raha tha

Mujhe apne sang duniya ghuma raha tha
Meri sunkar kuch apni suna raha tha

Chandani bhini bhini si barasa raha tha
Kisse kahaniya gadhe ja raha tha

Ankhon me sapne bhare ja raha tha
Lori sunakar thapakiya diye ja raha tha

Batoon batoon me fasla ghata ja raha tha
Milo door ka aasma karib aa raha tha

Achanak wo roshni mattham kiye ja raha tha
Ek nayi subah ko jindagi diye ja raha tha

Ek pal tanhai me ...

Barso chalte rah hai taptapati dhoop me,

Apana ask dekha nahi kabhi parchai me

Bulandio ko choone ka nasha tha is kadar,

Socha nahi kuch daba hai gaharai me

Patthar dil ban gaye the jamane ko dekhkar,

Ek aansoo bhi na bahaya ruswai me

Manzil ko badte kadam thame nahi kabhi,
kabhi thahare nahi ped ki tarai me

Jaldi me the ham ya waqt thahara nahi,

Bitaya nahi kabhi ek pal tanhai me

He sath khuda

Tanhaiyo ki bate karate rahe sabhi

Pahali bar ham gufatgu me shamil na the

Soch rahe the kaha chupa betha tha khuda

Ya ham hi use mahasos karne ke kabil na the

Wo to har kadam mere sath chal raha tha

Manzil thodi dor thi par raste mushkil na the

Uske bharose chal pade the anjan raho par

Kashti mudi nahi un laharo par jinke sahil na the

Andhero ko apna mukkadar samjhane lage jab

Roshani ne muskurakar kaha ham usake katil na the

He sath khuda to har jang fatah honi hai

Pa jayenge wo muka bhi, jo ab tak hasil na the

Hame darna tha .........

Safed kapado me lipti wo suli par latak rahi thi

jisase hame darna tha

Cham cham payal hamare pero par wo baja rahi thi

jisase hame darna tha

Mera hath thame mout ke kue me wo le ja raha tha

jisase hame darna tha

Kale pardo ke piche chupe the wo daravne chehare

jisase hame darna tha

Kali kabar ke kisi kone me soyi thi wo zinda lash

jisase hame darna tha

Andheri gufa ki uchayi par lataka tha wo khokhla sharir

jisase hame darna tha

Kono ke parado me cheekh rahi thi wo anjan awaze

jisase hame darna tha

Dararo aur surakho se jhoor rahi thi wo chamkati aankhe

jisase hame darna tha

Badi bhayawah lagani thi wo andheri gufa ki deeware

jisase hame darna tha

Khilkhila rahe the apne ander kahi chupe us dar par

jisase hame darna tha